Kalt sumar....kalt á greni..

Góðan daginn.

Þessi sumarbyrjun er búin að vera algjör hörmung veðurfarslega séð. Stanslaus norðan átt og kuldi. Við ströndina liggur svo þokubakkinn og kemur inn yfir landið á kvöldin. Hafa þessar aðstæður gert grenjavinnslu erfiða. Það er meira en að segja það að liggja úti í svona kulda, þokan stundum það þétt að það sést ekki einusinni heim á grenin þó legið sé í haglabyssufæri. En ég sjálfur hef ekki legið á greni þetta sumarið. Er búinn að leita langstærsta hluta míns svæðis hér í kelduhverfi, en ekkert greni fundið í ábúð. Í kelduhverfi á eftir að leita svæðið við hliðina á útungunarstöð(þjóðgarðurinn í jökulsárgljúfrum)  okkar Norður Þingeyinga. En þeir hafa það enn að markmiði að sjá okkur fyrir nóg af ref. Tófurnar grenja sig inní garðinum og þegar líður á fram á haustið þá koma þær oft trítlandi út í ætisleit. Svo sá ég hér í riti frá þjóðgarðinum(útungunarstöðinni) sem sent var á alla bæi hér að þeir ætla svo að fá Pál Hersteinsson hingað í haust til að halda fyrirlestur um refinn. Það verður áhugavert og um að gera fyrir áhugasama að mæta á það. Ég var einmitt nú í vikunni að fá frá Páli aldursgreiningu á 3 fullorðnum tófum frá í fyrra sem ég náði við gren. En það getur verið gaman og ekki síður gagnlegt að fá hinar ýmsu upplýsingar um dýrin. T.d. voru þessi dýr öll í eldri kanntinum eða 2 þeirra 6 ára og eitt 5 ára. Tel ég að þessi vinna Páls sé af hinu góða. Hann hefur safnað upplýsingum um refinn síðan 1979. En ég er þeirrar skoðunar að það hljóti að vera til framdráttar að vita sem mest um refina. Ástand þeirra getur sagt manni mikið. Páll segir að hugsanlega sé refastofninn enn að stækka. Kemur það ekki á óvart og verður fróðlegt að fylgjast með framvindu mála nú þegar að ríkið er hætt að taka þátt í kostnaði við að halda fjölgun refsins í skefjum. Eða má kanski þá segja núna að ríkið taki þátt í að efla og stækka refastofninn? Með að hætta fjárframlagi við veiðarnar og með því að stækka friðlöndin fyrir refinn?? Maður spyr sig allavega :) Maður vonar bara að þetta hafi ekki afgerandi áhrif á fuglaflóru landsins en ég óttast það.

En allavega þið sem komið hér inn lesið þetta, vona að þið hafið gaman af. Ekki er nú verra ef að þið vilduð eitthvað tjá ykkur. Commentin eru opin fyrir alla og endilega nýta ykkur það. Svo megið þið skrifa í gestabókina, það væri vel þegið :)

Gott í bili
Kv, Sveinn

Athugasemdir

[svanur (IP-tala skráð) 22.6.2011 kl. 09:47]

 Hér er lítið um þokuna en stöðugt norðanrokið og kuldinn hefur sett stik í vinnsluna.

Er ekkert meira á ferðinni af gelddýrum þetta árið  hjá þér ??

Kv.s

[Morri (IP-tala skráð) 22.6.2011 kl. 11:47]

Sæll frændi

Skemmtilegt að heyra þessar aldursgreiningar hjá Páli.  Vonandi kemur hann og heldur fyrir okkur kynningu á refum ;) heh

En hvað segir þú um aldursgreininguna, giskaðir þú fyrirfram á hvaða aldur var á dýrunum? Hvernig kom það út?

Svipaða sögu er að segja af Melrakkasléttunni sjálfri, sára fá dýr á ferðinni.   Aðeins legið í 2 grenum þar sem stundum er í 10-12.

Ég sá eitt dýr í gær, þegar ég var á leiðinni heim eftir að hafa leitað að  grenum sem nánast eru að glatast. ( fann þó 2stk)  Getur verið um gelddýr að ræða, en mér fannst það heldur mikið smogið til þess.  Dýrið var svo styggt að það leit aldrei við.  Hefði ekki getað náð því þó ég hefði verið með riffilinn í klofinu!

Ég á þó eftir að leita 2 greni, og 2 greni sem eru í sama radíus og annað þeirra.  Það bíður betra veðurs.  Reikna með að leita það á hestum, þá skitpir veðrið ekki öllu, en ég fer ekki á hestum, þá þarf að vera betra veður en þoka og næturfrost.

[Stefán Jónsson, 22.6.2011 kl. 20:46]

Ég fór í gönguferð í Friðlandi að Fjallabaki um síðustu helgi. Sá 2 skolla, annan við upptök Rangár en hinn spígsporaði nú bara kotroskinn yfir þjóðveginn einhvers staðar á milli Galtalækjar og Landvegamóta.

Veðurfarið á Íslandi þessa dagana má fara til andskotans, þaðan sem það er upprunnið.

[sveinn bj (IP-tala skráð) 22.6.2011 kl. 23:18]

Svanur: tja ekki tel ég nú svo vera. En ef engir hvolpar koma í dagsljósið seinnipartinn í sumar þá fer mann nú að gruna eitthvað sko :)

ómar: já við vorum með þetta sko svona ca. en náttlega er stundum erfitt að vera með aldurinn uppá ár, nema að senda hræin í greiningu. Hefur þú ekkert verið að senda Páli ómar?

Stebbi: Gaman að sjá að þú lítur hér við. En hvernig voru girðingarnar þarna hjá þeim?  ;)

[Morri (IP-tala skráð) 4.7.2011 kl. 00:34]

Nei ég hef ekki sent neinn.  En pabbi sendi einusinn eitt snoðdýr.

Hvað varðar það sem Stefán er að tala um að Fjallabaki.  Ég fann þar greni í fyrra, 6 yllar og 2 fullorðin þar á ferðinni..... það var bara milli Ljótapolls og Frostastaðvatns.  Þar sem friðlöndin eru, þaðan koma dýrin.

Ríkið hættir að taka þátt í kostnaði við veiðar, það er bara samræmi við "stefnu" yfirvalda.  Friða stór svæði og hætta að borga. Þetta verður bannað einn daginn, vitið þið til.

[Víðir (IP-tala skráð) 5.7.2011 kl. 13:56]

Sælir, þar sem þessi ríkisstjórn heldur ekki vatni þá er ekki langt að líða þar til ný og vonandi betri stjórn taki við. Sú stjórn breytir þá vonandi þeirri stefnu sinni að engin ógn stafi af refnum og leggi aftur til framlög til grenjavinnslu. Annars var ég að koma úr tveggja daga túr, fórum yfir 3 greni og í tveim þeirra. Náðum annarsvegar 8 yrðlingum og einu fullorðnu og í hinu refnum en sáum aðeins 3 yrðlinga sem við náðum, finnst ykkur það ekki frekar fámennt heimili?

[Víðir Jónsson (IP-tala skráð) 14.7.2011 kl. 15:06]

Er þér enn kalt ?

[Víðir Jónsson (IP-tala skráð) 25.7.2011 kl. 16:14]

Jæja Sveinn, fer ekki að líða að nýju bloggi ?? Nóg að gera hjá mér, erum búnir að ná 59 dýrum og er ég að fara á einn stað núna á eftir þar sem líklegt er að sé komið í gamalt greni. Maður heima sem gengur reglulega þarna út á strönd, og alltaf heyrir hann í ref góla á sig.

Kv. Víðir