Video af ref skotinn

Það er alltaf erfitt að reyna að miðla með skrifum þeirri upplifun sem maður fær við að liggja úti í náttúrunni, og upplifa hana beint í æð. Upplifa hvern fugl fyrir sig upplifa hverja tófu fyrir sig, upplifa sólina koma upp þegar nýr dagur er að hefja sinn gang.  Sérstaklega ef lesandinn hefur litla reynslu af því sjálfur. En það sem kanski hjálpar til við það er að taka uppá á video það sem fyrir augu manns ber, og það hljóð sem skilar sér inná það,  en það er oft mun erfiðara að taka upp.   Hver árstími hefur sinn sjarma, þegar maður liggur úti á veturna í kulda og myrkri þá er það frostið, myrkrið og hin óendanlega þögn. Þegar kemur framá vorið þá er það sérstaklega minnistætt fyrir hvern þann sem upplifir að vera kominn út í myrkri og verða vitni af þegar sólin kemur upp og í kjölfarið fara fuglarnir að taka við sér, syngja og tralla.  Á sumrin er það lífið sem er allan sólahringinn, fuglar í mónum, gæsir að fljúga yfir mávurinn gargandi í fjöruborðinu.  Á sumarnóttum kemur ró yfir þetta yfir hánóttina en fuglarnir eru alltaf á varðbergi, ef maður gengur um þá eru alltaf fuglar á sveimi í kring og láta vita að þarna sé nú einhver á ferðinni. Svo þegar maður er búinn að koma sér fyrir á milli þúfna eða bakvið barð, er jafnvel að bíða eftir tófu, þá heyrir maður það alltaf á fuglinum eða sér það á fuglinum lengra frá ef það kemur tófa á svæðið. Fuglarnir hafa sitt viðbragskerfi. Haustin hafa sinn sjarma þegar daginn er farinn að stytta,  lauf og gras að sölna fuglarnir að týnast burt hver á fætur öðrum. 

En það það var einmitt einn fagran vormorgun fyrr í þessum mánuði að þeir frændur mínir og félagar Óli á fjöllum og Ómar frá Efri Hólum fóru vel klæddir, og lögðust í gamalt bílræ sem er  notað sem skothús. Var Óli búinn að sjá að það var tófa að ganga í ætið og hefur það oft verið umræðuefni hjá okkur að gaman væri að ná þessu á video. Eftir dálitlar vangaveltur var ákveðið að þennan morgun skildi þetta nú gert, þurfti að hugsa öll smáatriði vel, því ekkert má útafbregða annars verður tófan vör við hættu  og lætur sig hverfa hið snarasta. En þar sem að Óli er nú mörgum hnútum kunnugur þegar kemur að tófuveiðum þá að sjálfsögðu sá hann þetta allt saman fyrir og úr varð þetta líka flotta video hjá honum. Set ég tengil hér vinstra megin til hliðar á síðunni (tengillinn: mórauður refur skotinn í æti)endilega smellið á það og horfið á þetta, ef þið hækkið aðeins hljóðið að þá heyrast smá smellir annað slagið og tófan lítur upp, en þetta er bara örlítið snark í sætinu þegar skotmaður er að fínesera miðið, þessi tófa kippti sér lítið uppvið það en stygg tófa hefði sennilega getað hlaupið í burtu bara við að heyra einn svona smá smell.  En hvað um það þá er þetta frábært að geta séð þetta svona á videoi og vonandi er þetta bara byrjunin á skemmtilegum video klippum.

Kv, Sveinn

 

 

Athugasemdir

[svanur (IP-tala skráð) 28.4.2010 kl. 11:20]

 Þetta myndband er alveg snilld og skyttan ekki mjög gikkglöð.

[Morri skytta (IP-tala skráð) 28.4.2010 kl. 23:19]

Sælir

Lifandi náttúran, öllum tímum sólarhringsins allt árið um kring er stórkostleg upplifun.  Fáir upplifa hana eins og við sem eltumst við tófu.  Það er einstakt.

Þetta vídeó er mjög skemmtilegt, minnsta  brak og brestur getur haft úrslita áhrif, sum af þessum hljóðum heyrðust varla eða ekki á þessari stundu, þó þau komi í mic-inn.

Það var tilgangur þessa vídeo, að bíða eins lengi og við mögulega þorðum, að taka í gikkinn, þetta hefði getað verið búið ansi mikið fyrr :)